خاف ملّى يخاف ربّى يطلع كان ربى (الراء مكسورة)

كان يا ما كان فى قديم الزّمان راجل زوّالى حدّوا حد روحوا لا يخبّش لا يدبّش 
ساكن ببّوشتوا عندوا حوينتة فى جنب الدّار عاملها مخزن يحطّ فيه عولة العام..
وها هو كلّ عشية يتلمّوا حبيباتوا يعشّيو فيه حديث يجبد حديث حتّى يذّن العشاء
يقصدوا باب ربّى للجامع بصلّيو و كلّ واحد يشدّ ثنيّتوا.
نهار مالنّهارات وقف عليه راجل مضخم بوهرتوا سبحتوا ما تفارق صوابعوا
وجبينوا ينطق سماتهم على وجوهم ومطبوع بزيتونة كحلة نابى.. لقى عليه السّلام
وعرّفوا بروحوا .ودخل فى الموضوع على طول وطلب منّوا يتكرّم يكريلوا حانوتوا
على عويّم على خاطر عندوا سلعة قاعدة على قلبوا يحبّ يصرّفها فى الحوينتة..
وعويّم حلّ عينك غمّظها يوفى.. واضرب الرّاجل خماسوا فى سداسوا ..لا محالة
السّوم طايح.. آما ميسالش ما دام عويّم آكاهوا و موش باش يطوّل قال ما فيها باس..
وقال للكارى على الظّالين آمين اقصد ربّ العالمين .
بعد أربعة شهور و فات هاك السّلعة ولاّ الكارى يجيب فى سلعة جديدة ويبيع فيها
قال الملاّك فى قلبوا ربّى كريم خلّى يكمّل عاموا انشاءالله ديما جرّتنا سمحة 
وعتبتنا قسمها يجريلها والدّنيا أرزاق تساق وسعدك يلّى قلبك صافى .
وفى العام والكارى مطفّى الظّوء ..حشم الرّاجل قال نزيد نصبر عليه ياخى 
الحانوت باش يهزّوا على ظهروا.
بعد ستّة شهور قال ماعاد بيها وين شنوّا ياخى مافهمشى روحوا ياخى آنا نطلب 
عليه هاتو انكلّموا ونشوف حكايتوا . لم روحوا دخلّوا للحانوت فرح بيه الرّاجل
بالبوس وعمل معاه وين نحطّك يا طبق الورد.
الملاّك طبيعتوا حنينة ويعاشر صعبت عليه باش يجبدلوا عالموضوع روّح من
بحذاه ما عمل شيئ عالموضوع اللى جا عليه.
شهيرين اخرين قال يفرح بيّا ولاّ يقعد المرة هذى باش نفرّك الرّمانة ياخى 
آنا نطلب عليه.. وكبس روحوا وقصد الملاّك اللى عملّوا الفيلم متاع البوس
كيف العادة.. آما الرّاجل قسّح قلبوا وجبدلوا ياخى ترجّاه وقالّوا عجبتنى البلاصة 
شقولك لوكان تزيد تمدّدلى حتّى ينوب عليّا ربّى.. نعرفك حاشتك بحانوتك ومكش
ناوى لكرى على طول هانى نلوّج فى حوينتة قريبة.. آنا ولاّو عندى كليونات 
فى الحومة زيد اصبر عليّا مديدة زغيرة حتّى نلقى حانوت.
وافقوا الرّاجل وقلبوا ما قايلّوا خير آما اللّى يتعلّم بالخير ديما يلعن الشيطان
ويقول آنا نهلوس.
كمّل لعويّم الجمعة لولا الجمعة الثانية فدّ الملاّك الكارى عامل مولى الدّار 
موش هنى صدم عليه للحانوت والعصب يهزّ فيه وينفض .حدّ ما قالّوا رجّعلى
حانوتى يرحم والديك وقف الكارى وراء الكونتوار وقالّوا ياخى ما تعرفشى 
اللى توّا عندى حقّ تجارى أيّا تجبّد مالحانوت لنجيبلك الحاكم تبات فى
بوفردة شبحتنا .
تصدم الرّاجل وهو موش متاع عرك وفضايح ومشاكل.. خرج يكرّ فى ساقيه
والدّموع مظلّمة عينيه.. قهرة الرّجال صعيبة والغدرة سكّينة حامية تهبط
عالجّواجى طول .. الحاصل مرض و صار فيه وقعد مدّة مالدّار ما يخرج
لايزّى الرّاجل تمنيك عليه لا يزّى شماتة الحسّاد فيه والضربة موجعها
كيف تولّى ضربتين: مقصّ بونارين.
حار واستحار ومشى للمحامى قالّوا ما تنجّمشى تخرّجوا آما تنجّم تعملّوا
تعديل كراء قال فى قلبوا هاذى ماهى ثنيّة وجيعة راس وفلوس والله اعلم
ايجانى نجيك وخبراء قدّاش باش يزيدنى الحاكم.. دحاه لربّ العالمين وكتم
غيظوا ووجيعتوا.ودار فى الزوز.
نهار مالنّهارات هو قاعد فى القهوة مصهمم يغزر للدنيا وهى تضحك 
عليه شبّ فيه واحد مالحومة متكتك داخل كبة خارج قيام ..انتى تحكى معاه شرق
وهو يحكى معاك غرب.. سلّم عليه وقالّوا خلّص عليّا قهوة ..حشم الرّاجل موش
من عوايدوا المقربع يطلب قهوة ياخى عيّط لصانع القهواجى وقالّوا اعطيه
قهوة على حسابى.. وقعدوا الزوز ساكتين جات القهوة شعّل المتكتك سيقاروا
وتلفّتلوا وقالّوا رانى فايق بيك اللى الهمّ بارك عليك ووصاحبك شيطان وانا
ابليس زعيمهم صاحبى أيّا صلّى عالنّبىّ ..قالّوا ألف لا يزّيه
قال المتكتك صاحبك متجبرّ ومتكبّر ويحسايب بزوروا وخباثتوا ثنيّتوا 
مسرّحة والخير ديما دازز عليه صلّيتشى عالنبى.. قاّلّوا ألف و لا يزّيه
صاحبك محاسبى وقراها من جميع الشيرات لقاك على نيّتك بوهالى
واللى يتقالّك يجد عليك وزيد المظاهر لعبت فى عينيك وفوق هذا ودونوا
قراك مكش متاع مشاكل وآخر الامر تقبلها فى عظامك والخصام ما يواتيك
برّا زيد صلّى عالنبى ..جاوب ألف ولا يزّيه
الموارك هاذم ربّهم فلوس قول يعطيهم داحوس وضربة عالقازوز .. جاوب
قال آمين .
اللى ربّهم فلوس حطّلهم خرية فى عشاهم ومرّلهم عيشتهم من غير ما تخاصمهم
جاوب الراجل قال هذى صعيبة عليّا ما فهمتهاش قالّوا لمتكتك سيّب عليك
آنا نورّيك.اسمع الكلام وغمّض عينيك.
شدّلوا  قدّام الدّويرة فى جنب الحانوت ونجى بحذاك ولّى متعدّى خلّينى آنا نحكيلوا
حكايتك ونتى لاكان طارت قول نعم بعينيك .. التّاجر هذا يطلع قلاّب والنّاس
كليونات وصحاب سلعة ما همشى فايقين بيه خلّينا نوقّضوا اللى دايرين بيه
واللى بعمل ربّى مليح..
مشى فى الخطّ الملاّك واستمرّ الحال على هاك النّمط شهرين وبدات تخف السّاقين
ونهار نهارين تصير عركة كان موش مع كليون مع فورنيسّور وبدى يهزّ 
رجل توحل الأخرى ونهار نهارين عدل منفّذ يحوّس عليه اعلامات متاع شيكات
بلا رصيد واسمع وافزع وسمعتوا ولاّت زبلة حاشى اللى يقرى ويسمع.
المهمّ تمّ أمر ربّى وما تعرفشى منين تجيك واللى يحسب وحدوا ديما يفظلّوا 
الطّاغية ما يبرّكوا كان الفلس ويولّى بين السّاقين رفس.. والحكمة لا تعرفها 
لا عند صغير لا كبير ولا مهندس ولا مجنون.لا غنى و لا فقير على 
خاطر الحكمة والقناعة فنّ لا يعطيك حزن.وخاف منّوا هكّا   ملّى يخاف ربّى 
على خاطر يطلع كان ربّى (الباء مكسورة).